هل تعلُّم الـ problem solving هيفيدني في الشغل؟

قبل ما تعرف إجابة السؤال، لازم نوحد مفهومنا عن ايه هو الـ Problem Solving أصلًا؟

الـ Problem Solving هي مهارة أكتر منها علم (مع إن العلم جزء كبير منها)، المهارة دي هي القدرة على حل المشاكل بأقل إستهلاك للموارد (الوقت، المساحة، الفلوس…إلخ)، يعني مش بس مجرد الحل.

مثال علي دا لو طلبت منك دلوقتي طلب بسيط وهو إنك تجمعلي الأرقام من (1) لـ(10 أس 15).

بس؛ هو دا كل السؤال، تقدر تفكر في حل دلوقتي…

-متكملش قراءة غير لما تجيب حل, الموضوع بسيط متكسلش-.

لو انت حد مش مهتم بالـ Problem Solving ولا بالموارد المتاحة معاك هتحل الحل دا وهو إنك هتمشي من أول لـ 10 أس 15 وتجمع أي رقم يقابلك.

تمام؛ عاش جدًا حلك صح، (خد بالونة).

تعالى بقا نشوف الوقت، خليني أقولك إن حلك دا هياخد وقت حوالي 115 يوم عشان يتنفذ بسرعة الكمبيوتر المتوسط الموجود دلوقتي، فـ (هناخد منك البالونة تاني).

في حل أحسن وأسرع من كدا بكتير، هيخلي الألجورزم بتاعتك لحظية مهما كان الرقم، هتستخدم صيغة جمع الأرقام من 1 لـ n اللي هي n*(n+1)/2.

هنا انت نفذت نفس الحاجة وطلعت نفس الناتج لكن شوف فرق الوقت في الحل الأول عن الحل التاني، فانت في رأيك لو قدامي الطريقين همشي في أنهي طريق؟

طيب بعيدا عن المثال وندخل شوية في سوق العمل -وهو الغرض الأساسي للبوست-، هل الـ Problem Solving فعلًا مهارة مطلوبة ولا بندرسه للتسلية وخلاص؟

أكيد مهمة، شركات كتير جدًا بتعمل اختبار على الـ Problem Solving كجزء أساسي من اللإنترفيو -ايوه بيدوك مسائل تحلها وانت في المقابلة عشان يعرفوا هتبقا مناسب لطبيعة شغلهم وهتطلع شغل بجودة عالية ولا هتطلع شغل بيطلع نواتج وخلاص-، ودا منطقي لأن من مصلحة الشركة بشكل كبير إنها تزود كفاءة المنتج بتاعها ودا مش هييجي غير بشخص مستواه عالي في المهارة دي، مش بتلاحظ إن التطبيقات والمواقع بتاعت الشركات الكبيرة دي بتنفذ مهام معقدة ولعدد كبير جدًا وفي نفس الوقت بتكون سريعة جدا؟ هو دا السبب، في بعض الأمثلة لشركات بتشغل عندها الناس المتأهلين للـ ICPC World Finals بس، زي شركة نوون مثلًأ، ودا اللي يخليك كشخص بتطمح للشغل في مكانة مرموقة إنك تسعي لتطوير المهاردة دي عندك.