ليه ++C؟

هنتكلم النهارده ليه اخترنا لغة ++C عشان نستخدمها في تعلم الـ problem solving…

أولًا: في إتفاق من أكبر مهندسي البرمجيات على إنها أفضل لغة لتعلم البرمجة و ده مجاش من فراغ فهي من خلالها تقدر تفهم إزاي الـ Memory بتشتغل وغير إنها Object Oriented Programming Language -خد انت الخطوة دي وسرش عن المصطلح دا وأعرف أكتر عنه- و بعد لما تتعلمها هيكون من السهل عليك الانتقال لأي لغة اخرى.

ثانيًا: تعتبر لغة سهلة في التعلم و الإستخدام على عكس الشائعات حولها إنها لغة صعبة في التعلم إلا إنك بمجرد ما تتعامل معاها فعليًا الموضوع بيكون بسيط جدًا وده هيساعدنا إننا نركز على حل الـ problems مش إننا نركز على تعقيدات اللغة.

ثالثًا: ودا من أهم الأسباب إنها لغة سريعة جدًا في تنفيذ الأكواد وده هيقلل من وقت تنفيذ البرنامج الكلي ودا هيكون مفيد ليك وانت بتحل المشاكل لأنك هتكون ملتزم بوقت لتنفيذ البرنامج مينفعش إنك تتخطاه.

رابعًا: إن اللغة غنية بالمكتبات المختلفة اللي هتساعدنا في حل المشاكل بسهولة والمكتبات دي بتكون مجموعة من الـ Algorithms -يعني ايه الجورزم؟ شوف البوست اللي فات- الجاهزة اللي تقدر تساعدك علي حل أي مشكلة تواجهك بسهولة يعني مش هتحتاج إنك تنشئها من الصفر.

خامسًا: اللغة ليها كوميونتي كبير؛ فـ أي سؤال أو مشكلة تواجهك بحث سريع هيوصلك للحل بل لأفضل حل.