إيه اللي أنا محتاجه قبل ما أبدأ؟

طبيعي قبل تبدأ أي حاجة تشوف الحاجة دي مناسبة ليك ولا لأ، طيب أحدد ازاي؟

مناسبة يعني 3 حاجات:

عندك وقت ليها؟

محتاجها؟

مؤهل إنك تاخدها؟

بالنسبة للوقت فدي انت مش هتحتاج مساعدتنا في إجابتها.

بالنسبة للإحتياج فـ انت إما مقرر إن شغل السوفت وير هيكون مجال شغلك فحابب تطور نفسك في المهارة دي، أو لسا مقررتش فحابب تبدأ من دلوقت وتقرر بعدين، أو حابب تستفيد منها كمهارة في العموم ودي ننصحك بيها عمومًا، فلو مش حاجة من التلاتة دوي فانت مش محتاجها؛ علي الأقل دلوقتي.

تركيزنا في البوست دا على السؤال الأخير، هل أنا مؤهل إني أبدا بروبلم سولفنج؟

الأول في سؤال، هو في حد مؤهل إنه يتعلم وحد مش مؤهل؟

بالنسبة للـ Problem Solving فـ الإجابة هي آه لأنها حاجة تراكمية معتمدة علي مفاهيم كتير عدينا عليها؛ وطبعًا الأهلية هنا هنسحب منها الموهبة الطبيعية عشان دي مبتبانش غير لما نوصل لمراحل متقدمة من الدراسة.

طيب عرفنا إني محتاج أكون مؤهل قبل ما أبدأ بروبلم سولفنج عشان معانيش كتير وأنا بتعلم ويكون تقدمي سريع، إيه اللي أنا محتاجه بقا عشان أبقا مؤهل؟

انت مش محتاج علم خالص تقريبا (غير بس احتكاك بسيط بالبرمجة أيًا كانت اللغة)، كل اللي انت محتاجه هي مهارة حل المشكلات.

إيه دا استنى، أنا داخل هنا أصلًا عشان أتعلم حل المشكلات ازاي تقولي إني أكتسبها قبل ما أدخل؟

حلوو، انت كدا مركز، مهارة حل المشكلات اللي أقصدها هي في مراحل تعليمك السابقة كلها، كنت بتتعامل مع المواد الدراسية ازاي؟ وخصوصا الرياضيات، هل كنت بتشوف المسألة بتتحل ازاي وتحلها وخلاص ولا كنت بتحل كتير وتغلط وتفكر في طرق حل مختلفة وتفرض حاجات وتثبتها وهكذا لحد ما توصل للحل؟

هو دا نفس اللي إحنا هنعمله تقريبا في الـ Problem Solving، حتى إن الناس اللي بتكمل وتوصل لمراحل متقدمة هما اللي كانوا شاطرين في الرياضيات قبل ما يبدأوا أصلًا.

طيب أنا مش شاطر في الرياضيات هل مبدأش أصلًا Problem Solving ولا أهتم بيها؟

في الحقيقة المعلومات اللي اتعلمتها في الرياضيات مش هتفرق كتير، لأننا ممكن نرجعلها في أي وقت لما نحتاجها ولكن الناس اللي كانت بتحب تحل مسائل الرياضيات كتير و بطرق مختلفة و يكون عندها فضول تحل المسائل الأصعب و تعرف حل المسائل اللي بتقف عليها؛ الناس دي اكتسبت مهارات كتير بنحتاجها في الـ Problem Solving و بالتالي تقدمها بيبقى سريع نسبيًا، اما الناس اللي معملتش كدا هتحس شوية إن تقدمها بطئ (بسبب إنهم بيبنوا مهارات كتير من الصفر) ومن هنا بنشجعهم يقووا عزيمتهم و مييأسوش و ميقعوش في فخ المقارنات.